Koncert za pamćenje poklonilo je sugradjanima Glazbeno-prosvjetno društvo Tivat koje je sinoć u velikoj dvorani Centra za kulturu Tivat nastupilo na tradicionalnom „Novogodišnjem koncertu".
Dvorana od 600 mjesta bila je premala da prihvati sve koji su došli da uživaju na koncertu orkestra Gradske glazbe koji je za ovu priliku bio pojačan dijelom učenika i profesora „Muzičke škole Tivat". Pred publikom je nastupio impozantan sastrav od 48 glazbenika koji su Tivćanima poklonili skoro dva sata izvanrednog uživanja u bogatom programu što ga je proteklih mjeseci brižljivo odabrala i sa ansamblom minuciozno uvježbala kapelnica Gradske muzike Tivat, profesorica Martina Lukšić.

Atmosferu je odmah na početku koncerta zapalila Kuletinova koračnica „Kroz splitske kale", nakon čega je uslijedio Štrausov valcer „Tako je govorio Zaratustra". Tivatski orkestar limene glazbe potom je odsvirao jedan od najvećih hitova čuvenih „Bitlsa", kompoziciju „Hey Jude", a uslijedio je sjajan „Drugi valcer" Dmitrija Šostakoviča. Dok je orkestar u maloj pauzi „hvatao zrak", duo gitara Marko Rajčević- Romeo Lukšić je izveo čuveni Gibbonijev hit „Tajna vještina".
Aplauzi publike dočekali su kraj svake numere iz drugog koncertnog bloka u kome je Gradska glazba odsvirala Enijinu filmsku numeru „May It Be", a pozornicom se potom na radost najmladjih prošetao i sam Pink Panter praćen taktovima istoimene čuvene numere američkog kompozitora Henrija Mancinija. Prezadovoljna publika potom je uglas pjevala numeru „Ružo moja" dok je orkestar svirao taj hit nedavno preminulog trogirskog pjevača Vinka Coce. Duo flauta-harmonika Bruna Matijević i Goran Ševaljević temeperaturu je dodatno podigao jednim strastvenim „Tangom u Parizu", a onda je, sve uz trojicu meksičkih marijačija, Gradska glazba odsvirala tradicionalni meksički valcer „Cielito Lindo". Uslijedio je potpuri božićnih rok-pjesama pa su Tivćani izmedju ostaloga, slušali kako u izvodjenju puhačkog orkestra zvuči nekadašnji poznati hit Džordža Majkla i grupe „A-ha" „Last Christmas", dok je solo-nastup na trubi u tradicionalnim „Zvončićima" imao i lično Djed Mraz – jedan od najstarijih aktivnih članova GPD „Tivat" Toni Nikolić. Duhovit kao i uvijek tokom proteklih desetljeća kada je obučen u Djeda Mraza, najmladjim Tivćanima dijelio poklone, stari dondo Toni je preksinoć poklone uručio i predsjedniku GPD „Tivat" Borisu Lancerotiju, voditelju programa Mašu Čekiću i mladoj dirigentrici Martini Lukšić uz vragolastu opasku da se ona „dobro razumije u te stvari"....
Jedan od hajlajta večeri uslijedio je nastupom ženske klape „Bellezza" koju čine profesorice „Muzičke škole Tivat", a dame su zaista besprekorno, pored ostalih, izvele i staru tradicionalnu klapsku pjesmu „Loza u škripu".
Opšte oduševljejnje, višeminutni aplauz i prave ovacije izazvala je sjajna interpretacija GPD „Tivat" nimalo jednostavnog potpurija melodija čuvenog italijanskog kompozitora filmske glazbe Enija Morikonea. Prepoznatljivi tonovi iz špegeti-vesterna „Dobar, loš, zao", „Za dolar više", „Bilo jednom na divljem zapadu", „Za šaku dinamita" i ostalih filmova koje je glazbeno oplemenio čuveni Morikone, odjekivali su dvoranom Centra za kulturu Tivat uz sopran solistkinje Milice Lalošević, pa je publika prosto očekivala da svakog trenutka na scenu banu i sam Klint Istvud , Eli Valah i Li Van Klif koji su ostvarili nezaboravne uloge u tim vesternima Serdja Leonea.
Kulminacija novogodišnjeg koncerta bio je naravno, čuveni „Radecki marš" Johana Štrausa, a na bis oduševljene publike orkestar je odsvirao čuvenu melodiju iz crtaća „Looney Tunes" i opet na kraju impozantni potpuri Morikoneovih djela.
S. Luković